مرحبا أصدقائي كيف حالكم ؟؟
إشتقت لكم كثيرا .. إشتقت لسوالفكم .. وتعليقاتكم الجميلة <--- وش عنده أطفال الجنه
آسف لأني ما نزلت تعليقاتكم على الموضوع الأخير وما رديت عليها الا قبل شوي
بس عمو بلوقر ما قالي ان فيه أحد علق .. وحسبت انكم كرهتوني فجأه <--- موسوس
اليوم عندي أسئلة كثيييييرة .. حبيت أدوخ راسكم معي فيها ..
يعني ايش أصدقاء في التدوين بس بالحلوه .. ولما تجي المره كلكم تهجون إلى البعيد
يله إستمتعوا بالأسئلة .. وكملوا للنهاية ..
.
- ليش كل ما شفت حادث " بسيط " بالشارع تكون ردة فعلي " أحسن تستاهلون
كله من الطفاقه الي براسكم " ؟ .. هل أنا شرير ؟؟ ولا فعلا " طفاقه العقل " والهماجه
هي سبب الحوادث وخصوصا ان اكثرها مدري شلون صايره ؟؟
- ليش كل الناس يسمون عيالهم فهد وذياب وصقر وشاهين .. ليش ما يسمونهم
فار او سنجاب او خرتيت او ضب .. ؟؟ الحيوانات الثانيه مالها رب يعني ولا أيش ؟
- ليش أنا أؤمن إن كل شخص له حيوان يشبهه ؟؟؟ .. هل أنا لوحدي هنا ولافيه أحد معي ؟؟
- ليش كل ما نتحمس على النت .. او بنجي نتفاهم مع شخص بيننا مشاكل .. يخرب
النت ؟؟ .. هل حتى اللاب توت <-- على قولة بنت أختي .. ما يحبون الدراما ؟؟
- ليش المسلسلات التركية كثيره .. أنا ما اعرف احد يتابعها .. إنتوا تعرفون ؟؟ ليش مزعجينا فيها طيب ؟؟
- ليش حليمه بولند في كل مقابله تقول جمهوري وجمهوري .. ما شفنا احد من ذا الجمهور ؟؟
هل أنا ما اعرف احد من جمهور حليمه وهم كثير ؟؟ .. ولا هي تضحك علينا ؟؟
- ليش المتزوجين .. البنت تعيش طول عمرها تتكشخ وتتأنتك وتتظبط .. والرجل ما يقص
أظافره الا مره كل ثلاث شهور ؟؟؟ ... ليش مثل ما تكشخ الزوجه لزوجها يكشخ هو كمان
لها .. ؟؟ .. ولا عشان الرجال مخلوقات ترا ولاتشم <-- حشا وحش ذا مو بني آدم .. ؟؟
- ليش كل المبتعثين السعودين ..في الغربه اما يخربون مررره او يتدينون مررره ؟؟ ليش ما يجلس
كل واحد على ما كان وهو في بلده ؟؟؟ .. ليش يا ربي ليش ؟؟
.
- ليش فيه مليون الف جزء من كتااب لا تحزن ؟؟؟ هل معقوله كل الناس جالسه تحزن وهم
في حاجه لشخص عشان يقولهم لا تحزنون لهذي الدرجه ؟؟
.
- ليش كل ما جيت أبتحمم يبرد الجو ؟؟ صدق ليش ؟؟
.
- ليش الأطفال لما يجلسون يتفرجون على قناة طيور الجنه .. تحسهم
منومين مغناطيسين ؟؟ @-@
- ليش القناة السعودية تجيب في الإعلانات حقتهم بنات محجبات وفي المسلسلات
بنات فالين ابو الشعر ؟؟؟ وش السر يعني ؟؟ متابعين الاعلانات يعني غير
متابعين المسلسلات ؟؟
.
- ليش عندي احساس دايم اني بفوز بالأوسكار ؟؟ مع اني ما ابيه <-- طيب صدقنا ؟؟
.
- ليش البطه صوتها ماله صدى ؟؟؟
.
- ليش من يوم وانا بالإبتدائي اسمع مدرسين الدين يقولون " إن أمريكا الآن تعااني من ويلات
الإختلاط والكونقرس الآن أصدر قرار بفصل المدارس والجامعات ومنع الإختلاط " ؟؟
دام القرار طلع ليش ما شفت شي ؟؟؟
.
- ليش البنات اذا صاروا برا البيت لازم يدخلون الحمامات العمومية كل ثلاث دقايق ؟؟ .. ما يقدرون
يمسكون أنفسهم مثلنا ولا ايش ؟؟ ليش صدق فسرولي ؟؟؟
.
- ليش الأمهات ما تحلى لهم السوالف الا لا صارو عند الباب بيطلعون يودعون بعض ؟؟؟
.
- ليش كل شوي أطالع في جوالي أشوف وصلني شي ولا شي .. مع اني ما سمعت نغمه ؟؟
.
- ليش مافيه مدونيين سعوديين كثير بالبلوقر ليش هاه ليش ؟؟؟
.
- ليش كل هالأسئلة السخيفة ؟؟؟ ما ادري ليش ..
.
والحــــين ..
جا دوركم ...
أبغى أسمع من كل واحد أقل شي ثلاث أسئله محيرررة نتشارك في الإجاابه عليها ..
لا تتأخرون علي أنا دائم بإنتظاركم ..
هالمره بشيك على التعليقات بنفسي ما بثق في مستر بلوقر يرسلي ايميل يقولي فيه ان
فيه احد علق ....
ســـــــــــلام
